台語講章 – 上帝啊！阮用你的物獻互你

歷代志上29:10-14、羅馬12:1-2, 3/9/2003【王忠信牧師】

有一間鄉村的教會，大多數的會友攏已經卡有歲，連聖歌隊隊員也是老兵老將，牧師自己指揮。因為隊員年紀大，有幾位實在是身體未堪得，未凍常常出席練習，閣一位加真會唱的姐妹過身，結果只有剩六、七位隊員，吟出來的聲音，不是無力、變調走音、就是一拍拖到一拍半。牧師真無耐性，感覺無好聽，人數猶閣無幾個。有一日就對大家講：「我想以後主日禮拜，咱m免閣排聖歌隊獻詩，因為咱練了真辛苦，唱起來閣不好聽。」大家雖然真m甘，想講既然牧師著安

呢講，阿無咱辜不彰照牧師的意思，聖歌隊就解散。

有一日晚時，牧師夢見上帝對他講話：「牧師啊，我最近攏無閣聽見恁聖歌隊練習、獻詩、唱歌的聲音！」牧師就給上帝講：「唉呀，我已經給in解散啦，大家年紀攏真有、無氣力、人少，聲音嘛無好聽，閣常常唱未準，唱這款形，互會眾聽起來實在是真壞勢。」上帝講：「壞勢？豈有影，什麼人安呢講？我逐次聽in吟，攏感覺非常好聽，我尚介愛聽in唱歌吟詩的聲音，嘛上愛看in吟詩真認真、面笑咪咪，親像囝啊，真美真古錐。」這時，牧師忽然醒起來，過來的彼個禮拜日，週報報告的頭一條，宣布聖歌隊定期的練唱恢復，主日禮拜的獻詩繼續，對彼時起，牧師一面指揮閣一面唱，逐次自己攏唱上大聲。

上帝不是欲聽最好聽的，最好聽的也與天使的聲音未比得。上帝也無限制著有什麼資格，才會使參與，上帝才會歡喜。上帝上愛的是人內心真自然主動、甘願、存感謝、歡喜奉獻的心。沒有這款的心境，所有的一切攏是加的。有一首台語短詩：

「安分守己心頭開，清心自在福相隨，

若是心中無掛累，食菜飲水也會肥。」

雖然這首短詩，不是在講起主動、甘願、樂意、歡喜奉獻的心，總是會通互咱感受到「自然、清心、真」的境界。「心頭開，清心自在，心中無掛累」這款的境界，也就是咱奉獻事奉的心境。

基督徒的奉獻，是真單純將咱的恩賜、咱的時間、才能、金錢、疼心，用誠實感謝來還互咱的主，來為教會、來為眾人盡心、出力，14 「我是甚麼，我的百姓是甚麼，阮竟然會按呢歡喜奉獻啊？因為萬物攏對你來，阮用你的物獻互你。諸位兄姐，這是咱大家會得上帝歡喜鑑納的奉獻的基本精神。這個動機、這款的奉獻心，成全教會聖工。

上帝愛我做什麼？就是佇一台真大台的機械裡面，所找到的是一粒最幼最細的螺絲的位置，攏是上帝所為我安排的位。出名的佈道家慕迪他講：「你若未通做燈塔，你會通做一個忠實蠟燭，相款發光。」

一個真清楚奉獻意義，真實事奉的人，知影上帝對小小的一步一步開始導我，一段一段來向前，每一小步、每一段落，攏是受上帝看重，攏是『欲互聖徒齊備、欲起造基督的身體』。上帝佇眾教會、也佇咱的教會內，用、盡他所會得通拿出來的心神、時間、排做第一順位，歡喜代先獻互主使用，祂所疼的你，來起造建立教會。

盡心、盡性、盡意疼主你的上帝，此個誡是大的，也是頭一個。咱會使講：盡心、盡性、盡意的事奉，是事奉中最受上帝鑑納、最受上帝看重的。

有一個倩工，逐日替主人去附近的井邊打水，他拿兩個水桶，一個好的，另外一個有裂一孔，所以逐擺滿滿的歸桶水，倒來到厝，其中一桶的水只有剩一半。這個故事講：裂一孔的水桶看自己雖然真忠心，袋滿滿，總是到厝只有剩一半，逐日逐日攏安呢，心情真無好，對倩工講：「我真無快樂，逐日滿滿的水攏對我的身上漏無去一半，害你著多行歸若次。我實在無路用，無親像另外彼個會通袋滿滿」。

隔日這個倩工，就佇欲閣再去打水時，報有裂一孔的水桶看，佇路邊開真多真美的花，倩工給它講：『我常常會摘這些花，拿倒轉去插佇主人的房間，主人足歡喜。』閣給水桶講：『我知影你會漏水，所以我佇路邊灑一些花的種子，每一日攏是你供給這些花子所需要的水，就是因為有你拿做缺憾的『會漏水』所漏出來的彼些水，才開出這呢美的花。裂一孔的水桶，真無完全、有缺陷，總是相款他還是會通發揮他的路用，為著世界帶來美麗價值！修女德勒沙講：『我若無將我小小的一滴水，互它流入大海，就大海永遠有缺憾』 。m通看輕我自己，上帝看重咱、也用咱歡喜為主來付出的一切。

事實！有時咱會想講，咱的個性那呢無完全、閣有奇怪的脾氣，想起來、反省起來實在是非常不配的身、心、靈。諸位！咱還是會通奉獻給主。無有一個人是到完全、是聖人、是到言行一致、是做人處事攏無通嫌，才會通事奉。若是安呢，每主日站佇台啊頂，講甲全是道理，做起來無半步的牧師最無資格。鄉村教會老兵老將，無氣力，人少，聲音嘛無好聽，常常唱未準、變調，無管三七二十一，就是憨憨啊用心、歡喜感謝，直直吟的阿公阿媽的聖歌隊，上帝真甲意。每一位用心將咱所會的，將咱的恩賜、才能、專長、來盡力佇咱受召受託的位置、職務、角色，嘛憨憨啊用心、歡喜感謝，直直吟，努力榮耀上帝，用時間、心神、金錢、甚至是心血生命為主「全然奉獻」，行佇真實奉獻的路上的你，上帝的確無看輕。

1865

年有一位才16歲的青年人，佇他那年生日11月21日那一日，將他生命完全奉獻互主。那日他簽一張『獻身契』，對那日以後直到他離開世間，七十年久，每年的十一月廿一日，他攏會佇這張『獻身契』頂面繼續簽名，表示對主的忠誠。這位是對英國到台灣，是台南神學院的創設者：巴克禮牧師。他佇『獻身契』所寫的：其中的部份，(對第三段到第六段)；他寫講：

今仔日我用最嚴肅的態度，將自已降服於你，我決意放棄過去所有主宰我的。又將我自己與所有的一切，就是我的心神能力，我的四肢百體，屬世的財物，我的時間與對別人的影響力，攏完全獻給你，做你的路用，來歸榮光給你。我決意順服你的命令，永遠無改變，我決意一世人用謙卑的心順趁你的旨意，又用熱心與歡喜來遵守實行你的教示。

在你引導下面，若是照你無所不知的安排，認為這是榮耀你最好的方法，我甘願放棄我個人，與我個人所有的。

我願意讓你來管理我的一切，我願意誠實講:「無照我的意思，是照你的旨意來成。」我甘願用忠誠的心，歡喜接受你無限的治理，這也是所有受造，看作歡喜的。

主阿！求你差用我，做事奉你的器具，將我看作你特別選召的人。讓我在你所愛的子的血得著洗清。讓我穿祂的公義，藉祂的神來成聖，改變我，使我越來越有祂的形象，通過祂，將你一切的聖潔，喜樂和安慰的神，就是我所需要的氣力賞賜我，讓我在這些氣力幫助下面，在你——我的父上帝慈愛的面光照下面，度過我的一生。

看見真多信仰先輩，獻互主用的決志與祈禱，特別巴克禮牧師佇

他每年生日重新立約提醒自己，致意真正奉獻互主的精神，互人感動欽佩。比起這些信仰先輩，佇事奉的田園裡，咱實在是攏未堪得算是什麼！世間人的心態是「得」為目的，若是基督門徒的心態，是「付出」。基督徒的生命親像流通的水管，上帝有多少恩典流入來，攏看基督徒本身豈有對咱的身上流出去，流入去佇上帝福音的田園，流到別人身上，互人因為咱有得到積極的激勵，感受主的恩典，相與舔到美好信仰的福氣。

奉獻的意義，不是將我自己所有的，完全拿出來分給大家，奉獻不是奪去我所有的，是將我所有的交託佇主手中，懇求主互我知影，佇主需要的所在，順趁主的呼召。找到我事奉的位置，肯定我自己佇上帝眼睛中的價值，真心感謝照本份奉獻出來，福音的園地就是因為一粒、一粒，上帝的兒女這款的心，來閣卡廣闊、閣卡美麗。

嘉義基督教醫院創院院長戴德森，佇一九九六年倒轉到台灣領受台灣政府所頒互他，第六屆醫療奉獻獎的時，佇嘉義基督教醫院感恩禮拜中所講說的話，也是唯一的一句話。『用最大的疼，做最小的事』。他講，最大的疼，就是耶穌基督十字架頂的疼，最小的事，就是佇你四周圍一切大、細、繁雜、簡單，甚至無人注意當的事。

台灣浸信會呂文德牧師將他所觀察到兄弟姊妹佇教會活動出入、主日來參加禮拜的心境，給它歸納做七型：逃避、欣賞、交誼、儀式、驕傲、敬虔與事奉型。他用中文寫，我小可改做台語：

1.逃避型：四處充滿罪、厝內常冤家、拜堂暫寄身、閒事免插伊

2.欣賞型：牧師名氣大、口才也無差、節目排了好、一定愛參加

3.交誼型：六日無見面、暗時攏失眠、見著咱鄉親、話攏講未盡

4.儀式型：傳統的家庭、聚會無時停、逐擺跑進前、看來是虔誠

5.驕傲型：道理早聽多、讀經知講道、教會做大哥、逐項我認可

6.敬虔型：感恩心虔誠、勤祈禱讀經、生命越豐盛、榮神好見證

7.事奉型：代先來款拾、搬椅閣扛桌、攏總準備好、堪得受謳咾

已經過身的基督徒殘障作家劉俠(杏林子)佇她所寫的一本書叫做「寫給成人的童話」中，有一篇「與土對話」。有人問土腳的土講：你與花相比，花有美的外形、有香的氣味、也有優雅的風采。偌多詩人吟詩作詞謳咾它；偌多畫家用花取材來畫它；偌多人欣賞它，總是「土啊土，你是什麼？」

「土」聽見人對他安呢問，「土」對那個人講：「朋友啊！你錯

了！」我有花全部生長的經歷，它萌芽，我分享它生命奧妙的歡喜；幼嫩的歲月，我體會它的苦悶；壞勢見笑少年家的年日，我分擔它隱藏的心事，風華絕代的時刻，我恬恬欣賞它的榮譽掌聲；成熟日子，我與它慶賀豐收的歡喜。直到它枯乾連去，我猶為它擔起養育下一代的責任。你知，恁所有所看的是花外在形象，我卻擁有它整個生命。

實在是真會勉勵咱的故事、互大人的童話，咱著成做親像「土」用信心，用疼心，用咱的認同與支持包住佇咱教會這個體，與整體教會團契，與咱的T.P.C.以及兄弟姐妹分享感謝恩典、體會分擔事奉、生長的苦悶及心事，欣賞慶賀教會日日增長的歡喜。

我真愛的一首真會打動咱的心，互咱真有感受短詩、安呢寫：

二九暝的歌聲遠遠在吟、

冷冷的北風直直在吹；

今暝我閣注神看彼個點著的火煙慢慢在飛、

這曾是阿公點著的火、是老父接給我的火把；

雖然m知為什麼、

我愛彼個炎炎的火！

不知咱聽到這首詩，有什麼感觸及感受！寫詩的人，寫起當他點著二九暝的火，家庭佇二九暝年尾的時特別的儀式，他心底感受到一家大細團圓，代表一家人生命，代代傳落來的感動與激勵。做屬佇美國長老教會萬縣台美長老教會的諸位以及台灣人教會聯合會(T.P.C.)一份子的你與我、咱大家，是不是也有察覺到一代一代傳落來，講未出的感情，一代一代傳落來，今啊日擔佇你與我肩頭頂的責任。

「一枝草、一點露」每一日透早在庭裡所會通看到的情景，青青的草啊有露水的潤澤，互咱感受上帝對地上萬物的疼惜，卑微小可的一枝草，也通得到一滴一滴露水，未致到枯乾。草啊，有上帝的眷顧，會通佇大自然中奮鬥生長，何況是咱！早時許大人對欲離開家鄉出外去打拼的子兒講：「乖孩子，一枝草，一點露，天無絕人的路」。

佇南加州T.P.C.記念主日的此時，回想過去，咱教會對1990年佇Cal State Pomona、 Cal Poly大學邀請高俊明牧師、及楊啟壽牧師來做講師的聯合靈修會，就開始有幾位兄姊參與。那年12月22晚時，聖誕節特別的聚會，愛餐開始，禮拜、也舉行洗禮與慶祝會，若親像是無久以前的代誌。91年二月初十，250名T.P.C.各教會兄姐作伙來參加會通講是剛起步的咱教會特別的感恩禮拜，幾若十位不曾作伙練唱過的兄姐自動上到台頂，同心吟『咱著來吟詩』。對那時到今啊日，咱教會投入參與T.P.C.每一項活動的努力熱情，互眾教會兄姐一直記得。感謝上帝不時感動真多兄姐，為主為聯合事工打拼走蹤。長年以來，T.P.C.這個組織，繼續負責咱南加州眾臺灣人長老教會聯繫、聯合事工的責任。雖然教會歷史中也未免得有起落，有日出也有日落，總是疼咱的主，繼續點著一葩火來導咱。一葩燈火只有會通照著幾尺的頭前，只有會通互你看見頭前的一步兩步，總是這葩火隨你踏出去的一步，閣照光你頭前的幾步，只不過是通照你頭前一兩步的燈火，卻照光你旅途長長的歸條路。諸位！上帝就是安呢導咱的人生，也安呢導咱的教會，祂佇路頂，一步一步對咱顯露祂佇咱頭前引導。

一隻一身軀專專腳的蟲，有人問他，你這多腳是安怎行？蟲想來想去，安怎想嘛想未曉得我是安怎行腳步。越想越試、越未自在，這支腳先行或是那支腳先出去，攏不對，一面想講是哆一腳先踏出去，一面行看嘪，險險趴趴倒，真正是舞加歸身驅嘛未解決，遂未曉行。虫吐一下氣，稍息一下，日頭對雲中射出來，蟲看見光，心輕鬆歡喜起來，向日頭蛇去，牠已經忘記得幾分鐘前所在想講，『那呢多腳，出腳的順序應該是安怎』，竟然此次行了真好勢。基督人生的款式真親像安呢，甚麼時咱一直想自己，咱就越行未行，就越未好勢，打開咱的心，真誠謙卑懇求主導咱、用咱，致意交託仰望，咱就自然會向前行去。

諸位兄姐，咱每一個人有無相的恩賜，著發揮你的恩賜，互人因為安呢得著歡喜、安慰、激勵，互教會的每一事奉聖工，佇作伙聚集的禮拜，佇咱所屬整體的T.P.C.聯合活動，通閣卡美、閣卡有體會感動，這是天父上帝所歡喜的。